Mbola manan-danja ve ny Testamenta Taloha amin'izao Fotoana izao?

Ny Testamenta Taloha dia mihoatra noho ny roa ampahatelon’ny Baiboly. Ao amin’ny lafiny inona no mahasoa antsika amin’izy io? Misy ny milaza fa amin’ny lafiny ara-tantara na amin’ny hevitra misy hafanam-po mivoaka avy ao no hany tombon-tsoa azo avy aminy. Fa ahoana no tena izy? Tokony hianarana sahala amin’ny fianarana ny Testamenta Vaovao ve ny Testamenta Taloha? Ahoana no fiaraha-miasan’ireo fizarana roan’ny Baiboly ireo – dia ny Soratra amin’ny teny Hebreo sy ny Soratra amin’ny teny grika?

       Zava-dehibe ny hahafantarana ny valiny ara-Baiboly an’izany fahalalana fototra izany, alohan’ny handehanana lavidavitra kokoa amin’ny fianarana ny tenin’Andriamanitra dia ny Baiboly Masina.

1) - Avereno vakiana 2 Timoty 3:14-17. Inona ireo Soratra Masina nisy tamin’ny fahazazan’i Timoty? Mariho fa mbola vao nosoratana ny Testamenta Vaovao tamin’ny fotoana nahalehibe an’i Timoty.

2) - Nolazain’ny Apostoly Paoly ve fa ny Soratra Masina (ao amin’ny Testamenta Taloha) dia ilaina ho fampianarana, ho fandresen-dahatra, ho fanitsiana izay diso, ho fitaizana amin'ny fahamarinana?

3) - Inona no hevitry ny fahamarinana araky ny Baiboly? Salamo 119:172

4) - Avy taiza ny Didin’Andriamanitra ao amin’ny Testamenta Taloha: Avy tamin’i Mosesy sa avy tamin’Andriamanitra? Mariho ny Eksodosy 19:7, 20:1, 24:4, 12 ; Levitikosy 26:46 ; Deotoronomia 4:5

5) - Ahoana ny amin’ireo ohatra notahirizana ao amin’ny Testamenta Taloha? Mbola ilaina ve ireny amin’izao fotoana izao? Ahoana hoy i Paoly ao amin’ny 1 Korintiana 10:6, 11?

6) - Miresaka famonjena amin’ny alalan’i Kristy ve ny Testamenta Taloha? Jereo 2 Timoty 3:15.

7) - Hitan’ilay tandapa Etiopiana ve ny hafatra momba ny famonjena ao amin’ny Testamenta Taloha? Jereo Asan'ny Apostoly 8:27-35.

8) - Afaka nahazo ny dikan’ny Testamenta Taloha ve izy raha tsy nisy ny Testamenta Vaovao, araka ny fampianarana nentin’i Filipo? Mariho tsara io zavatra madinika io ao amin’ny Asan'ny Apostoly 8:35.

9) - Na dia nitahiry fatratra ny fanambaran’ny Testamenta Taloha aza ny Jiosy, dia tena azony tsara ve ny zavatra nambaran’ny hafatra tao anatiny? Mariho izay hazavain’ny Apostaoly Paoly ao amin’ny 2 Korintiana 3:14-18.

10) - Inona ny hataon’i Jesosy Kristy amin’ny Testamenta Taloha? Jereo Matio 5:17. Fanamarihina: Ny teny grika nadika hoe « hanatanteraka », pleroo, dia mbola ampiasaina ihany koa ao amin’ny Matio 13:48 (feno), Lioka 2:40 (feno), Efesiana 3:19 (hamenoana), ary any amin’ny andininy hafa.